لە ئەنجاما خۆشی
ئەبێ بە ئەو
ئەبێ بە خەندە و
لە باوەشی گۆرانیەکی
کێوی دا
غەریبانە ، پێ ئەکەنێ .
مەرگ غەریبانە پێ ئەکەنێ .

کەریم کوری باوەرەکانمان
گلێنەی چاومان
هەڵۆی هەموو چیاکانی جیهان
تۆ گۆرانیەکی پیرۆزی
سروودێکی ، شین شین
لە باوەشی ئاسمانێکی
هەتا هەتایی دا وەرکەوتوویی
بنوو بنوو
هەموو وشەکانی خۆشەویستی و
جوانیت پێ دا ئەدەین
ئێمەش لە جنوونێکی بێ برانەوەدا
جێ بهێڵە
تا کوو
لە خەیالی حەسانەوەی
سەرچیا و چایەکی گێلاسی و
باڵای ئەرغەوانی تۆ و
هێندی ورکە خەندی ، بەڵاڵووکی و
سوور بوونەوە و شەرمی جوانت
بتلێینەوە ،
تۆ هەڵۆی شاخەکانی رووحی ئێمەی
تۆ سیاچامەی دڵی ئێمەی
تۆ هی ئێمەی . تۆ تۆ
کاکە گیان تو خوا بنوو بنوو بنوو.